شوقي لي بلدي الحبيبة
الوريفة
الشاعر كرم الله حسن خضر
اشواقى لبلدى الحبيبة ديمة العيون تفضحى
اشتقت للنيل والضفاف والجلسة فى ضل الضحى
اشتقت لى تربال يغنى فى الحقول وسط السنابل
فى الهجير ونصو عارى قدامه مليانه الجداول
كل مناهو يلقى بلده عامره بالروض والخمائل
ينسى يومها شقى السنين يلقى النعيم فى ربوعه سائل
اشتقت لى نواتى يقدف فى البحر دافر مراكبو
يصادم الموجات يصارع والشراع الريح تلاعبو
مره عند الدفه واقف ومره للمقداف يداعبو
قدامو اطفالنا الصغار فى الترع بالتوب يلابقو
اشتقت لبلدى الحنونه اشتقت اقوله يمه يابا
يا حليل جلسة عشية عامره بالناس الغلابه
كل زول فى حقله يكدح العصير راجعين تعابه
رغم الزمن قاسى وعنيد البلد صاينين ترابه
السلام منى ليهم لى كل ايد شايله الطوارى
تحية لى تربال يناضل حب التراب فى دمه جارى
سلامى ليهم من دواخلى فؤادى ليهم ديمه طارى
لى كل زول صامد هناك للكببر حتى اليبارى
ارتلاوى
للحروف يلاوى
الخرطوم
اغسطس 1988م