الوجع راااقد…. عبدالله الحلفاوي يكتب

الوجع راااقد

عبدالله الحلفاوي
🔴 كتير بنلقى زول قعد براهو فى طرف السرير وفتح تلفونو وبدأ يقلِّب فى صور قديمه .. وياخد وقفه عند صورة بيت كان مليان حنان وضحكات..او لمّة اهل كانت بتجمعهم صينيه وجبه واحده ، او كمان صورة زول عزيز ما عارف متين حيلاقيهو تانى .
يطوِّل النظر فى الصورة ويبتسم ابتسامه صغيره باهته ويقفل تلفونو ويسند راسو على الحيطه.. يلا ما لانو انتهى من الحزن ، لكن لانو ما عندو زول يحكي ليهو كل الحاصل جواهو.
🟠 وفى بيت بنلقى أم بتحاول تقنع أولادها انو بكره احسن ، بس هي ذاتا ما عارفه بكره شايل ليها شنو .
وفى مكان بعيد فى زول متغرب بيضحك مع اصحابو دا لو عندو أصحاب اصلا .. بس اول ما يرجع غرفتو بلقى نفسو قدام سؤال صعب .. ياربي أهلى وناسي بخير ؟؟ ويا ترى حارجع القاهم زي ما خليتهم؟؟!!
🟡 وما ننسى فى زول فقد شغلو او بيتو او إنسان كان بالنسبه ليهو الدنيا كلها لكنو لسه بقول ( الحمد لله نحن كويسين .. ومستوره ) .
🟢 انتو عارفين كم من الحكايات بتختبئ وراء الكلام دا !! وكم من الوجع مستتر تحت الابتسامه والضحكه الفاتت !! .
🔵 الحقيقه العايز اعرفها .. هل نحن فعلا كويسين ، ولا بقينا شُطّار فى إخفاء وجعنا ؟؟؟!!
🟣 يا جماعه الحرب دي ما بس فقدتنا بيوت وبعدتنا من الأهل.. لاااا لأ لكن كمان خلّت الناس مرات تفقد الاحساس بالأمان وتغيِّر طريقتها فى الكلام ، وهزت الثقه والتعامل مع بعضنا .
🟤 انتو عارفين وسط كل الظروف دى فى وجع تانى ما بنقدر نتكلم عنو كتير : وجع انك تكون تعبان ومنهار ومحتاج زول يحس بيك ، لكن ما تلقى حتى فرصه تشرح الحاصل الجواك .
⚪️ والأصعب من دا كلو ما الظروف الصعبه البقينا عايشنها برضو لاااا لأ ، الأصعب بقى فى اننا ممكن نتعوّد على وجع بعضنا !! وللأسف دا الحاصل .
⚫️ بقى عادى نشوف زول حزين وما نسالوا مالك ، ونسمع عن زول محتاج ونقول اكيد فى زول تانى حيساعدو، وكتير وكتير نشوف زول اتغيّر علينا ونحكم عليهو من غير ما نعرف ونفتش الظروف البِمُر بيها .
🟥 تأكد انو ما كل زول اتغيّر بقى كعب ، وما كل زول ما سأل عنك خلاص نسى العُشره، وما كل زول بقى بعيد قلبو اتغير ، لانو ضغوطات الحياه بتخلى الزول ما عندو طاقه حتى يشرح الحاصل عليهو .
🟧 نحن محتاجين نلتمس الاعذار لى بعض ونرجع نتعامل زي الاول بالرحمه ، ونكون متذكرين انو الناس ما متساويه فى درجة قدرتها على التحمل .
🟩 يلا ما تستصغروا قيمة السؤال عن الزول ، ولا قيمة المكالمة الصغيرة ، ولا كلمة ( مالك ؟؟) .. ومرات كتيرة رسالة واتساب بسيطه فى وقتها بتفرق كتير ، ووقفه صادقه ممكن تخفف حِمل تقيل .
🟦 عشان كدا اسألوا عن الزول ، وما تخلوا قسوة الظروف تبقى قلوبنا قاسيه على بعضنا .. وخلونا نكون اهل فى المواقف قبل الأسماء.. وافتحوا قلوبكم لى بعض قبل تفتحوا بيوتكم.
🟫 بلدنا دى ما محتاجه إعمار بيوت وطرقات بس .. محتاجه كمان إعمار النفوس وترميم العلاقات ، وأحياء روح التكافل والمحبه الكانت متأصله ومعروفه بين أهلنا.. فنحن أناس بنتقاسم العُسر رغيفا وفنجان قهوة، وكلمه طيبه ودعاء بيتقال فى غياب الحِيله .
⬛️ لانو وراء كل زول بنقابلو حكايه ما بنعرفها.. ووراء كل سكوت ممكن يكون فى وجع محتاج بس زول يسمعو.
⬜️ يمكن ما نقدر نغير كل الظروف، ولا نمسح أحزان كل الناس ، لكن علييكم الله على الأقل خففوا على بعض بدل ما تزيدوا الحِمل .. وياريت كمان ما تكونوا سبب لزول فى وجع جديد .
🔶️ صدقنى الشعب دا ما بستحق تخليهو وحيد يواجه الحرب والفاقه والفقد والوجع الحاصل دا .. فهو يستحق وطن آمن ولقمه بلا مشقه وليل ينام فيهو مطمئن بلا هموم وأوجاع.

🔸️🔹️🔸️

🔷️ ويااارب : وطناً نضحك فيه من فرط الفرح بعيداً عن الوجع ، ونقول فيه ( الحمد لله ) لأن الحياة ازهرت ، لا لأننا نحاول أن نقنع انفسنا والآخرين بأنها ما زالت مستوره.