دنيا فرندقس _ للشاعر العطا علي العطا_ البركل
الي روح الاخ الحبيب الصديق اليعقوب في ذكري رحيله وهو في مماته الحي تغمده الله بواسع رحمته
وجعل الجنه مثواه ٠
العطا على العطا – البركل
دنيا من قمنا فرندقس
والزمان المضي ماب يعود
ونسال الله العفو والرضاء
ويبقى حبل الصبر ممدود
والصفات السمحات شديد
تاني ربنا بيهن يجود
لا غرور لا غل لا غبن
ومافي زول يتعدا الحدود
شيلو يا يعقوب السلام
انت زولنا وماك مشحود
السلام للطيب وداعه
وللحبيب الغالي عبود
ولي حسن كلمون وياسين
وللنعام وادريس وقدقود
ود عجيب ونميري ابودوم
وعيسى الغنا غنا القعود
وطل محمد صاحب الطيف
قولو طيفك بينا موجود
وقبل ما تقلد ود عجيب
انت شتت فوقو الورود
السلام للقامه بلاص
خل فينا عظمه الجدود
تلقي بنده ابونا مبسوط
فوق عمائلو الطيبه مسنود
عن عوض عبدون النغم
فيهو طعم التمر الهرود
زيو زي طارق يوم رحل
خل قلب الغنوه مهرود
تلقي ابونا اليمني فرحان
في براح الزين ومريود
وتلقي خالد الكرو مستمخ
وجعفر المتوكل شهود
قول لي ود الزومه صاحبي
كلمو العطا فيك مغرود
من كترت الشوق الشديد
جاتو حمي شديده مورود
وناس بخيت والبركل واسحاق
وكل من كان ذكرو محمود
كلهم جمله بلا فرز
أي زول مذكور ومعدود
عظماء ما غنو عشان غرض
ومو عشان الظيط والنقود
كانوا قدر القيم الاصول
مره ما اخلفو للوعود
تلقي اولاد شايق وبدير
كل زول طمبورو مشدود
والدليب داقي مساء وصباح
وطاقى من فوق ليهو زغرود
في الطريق للجنه المبيت
وسوق معاك جميع الوفود
وابقي عارف اخونا يعقوب
نحن ماراجين الردود
بكره كلنا نحن راحلين
اصلو نحن عمرنا محدود
نحن من الفانيه ماشين
للخلود في دار الخلود
شن فضلنا غير الصيام
والخشوع في الصلاه والسجود
والشهاده وحسن الختام
يوم مروق الروح والبرود