مرشد .. حكاية قريه مليااانه محبه وانتماء
شبكة الوريفة الإخبارية
بقلم :_ عبدالله الحلفاوي
القريه ١٠ مرشد حلفا الجديده صحى مكان بسيط لكن مليان دفء ومحبه .. بيوتها قريبه من بعض وقلوب اهلها أقرب.
الشوارع فيها تراب .. ومافي ااي أسفلت بس الموده فيها ثابته وما بتتغير.
ما عندنا فيها مبانى شاهقه وعاليه .. لكن كبيرة وعاليه بى ناسها، فيها الضحكه صادقه .. والوقفه جنب بعض ما بتتأخر.
القريه مكان بسيط وناسها بسيطين.. لكن لما تضيق بيك الدنيا بتلقى فيها السند والناس البتخليك تقيف من تانى.
الناس هنا بتسلم عليك بإبتسامه صافيه وقلب طيب مافيهو اي تكلف ولا فى تصنُّع كل شي على طبيعتو.
الناس هنا معروفه بالطيبه والكرم وابوابها مفتوح قبل تدق .. والضيافة حاضره بدون سؤال .
حرفيا كلام شاعرنا الجميل ( حميد ) مطبق هنا
بيوت تفتح لى أدق.. او ما أدق
من غير تقول الزول منو ..
ولا حتى علَّ الداعى خير ..
ولا مالك الجابك شنو
بيوت تجيهن فى اي يوم
ان جيتا ليل ..
ان جيت دُغُشْ ..
طوالى ادفر الباب وخُشْ .
الفرح لو دخل بيت بيدخل كل البيوت..والحزن لو دق باب بيلقى الف كتف بيسندو والألم ما بمر على واحد بدون ما يحس بيهو الباقين.. لا فى دعوات رسميه ولا فى حسابات لكن فى محبه خالصه وإنتماء حقيقى ، وجوه بتجيك قبل تناديها وتلقى الكل واقف مع بعض مافى زول بتاخر لا كبير لا صغير .. الكل بيجى بقلب صادق ويد ممدوده يساعد يخفف الوجع والحمل .. والمشاركة ما بس حضور بل احساس صادق وتقاسم للمشاعر وعشان كدا الروابط أقوى والمحبه أعمق ودا بيثبت انو القريه أسرة واحده فى ( الفرح والحزن ) وفيها الواجب مشترك ومقسوم على الجميع وهى من أجمل الصور البتعكس قوة المجتمع وروحه الحقيقيه وهنا بتعرف معنى السند الحقيقى ومعنى انو يكون عندك أهل.
ديل أهلى..
ولو ما جيت من زي ديل ..
كان اسفاى وأسفاى
وآمأساتى وآ ذلى .
مرشد ما مجرد مكان بنسكن فيهو .. مرشد حكاية انسانيه مليااانه وفاء وتكاتف
مرشد روح ومحبه .. اهل وسند لى بعض فى كل الظروف.
عشان دا كلو وحاجات كتيره ماذكرتها الزول مهما يبعد عن مرشد قلبو بيفضل مربوط بيها لانو هناك فى ناس بتحبك بدون مقابل وبتقيف معاك بدون سبب .
ديل أهلى.. سندى وفخرى
بيهم الدنيا بتحلو .. وبيهم الوجع يهون 💜 ❤️
صوت شكر 🙏🙏
أهلى وناسي هوووى بمرشد الانيق وقفتكم وتعبكم معاي يوم فرحى كانت أكبر من مجرد حضور .. كانت حب حقيقى ومحل تقدير كبير .. رفعتوا راسي وفرحتونى شديد.
الناس التعبت ومشت .. الوقفت وساعدت والشاركتني الفرحه رغم بُعدى بكل صدق ، انتو ما قصرتو ابدا .. وتأكدوا انو الفرح كان حيكون ناقص من دونكم وانتو كملتو الفرحه وخليتو اليوم دا يوم ما يتنسي.. وانا ممتن ليكم من اعماقى وربنا يجازيكم خير ويجعل افراحكم دايمه زي ما فرحتونى ❤️💜
وشكرا من القلب لكل زول حضر .. ولكل زول حاول وما قدر .. وبقول ليكم والله نيتكم وصلت قبل خطاكم وظروفكم مقدرة ومحبتكم ومكانتكم محل احترام واهتمام كبيرين ومحفوظ فى القلب قبل الكرسي.
وانا متأكد الفرح ما بيكمل بالحضور بس لكن بيكمل بالمحبه وانا يكفينى انو مشاعركم ودعواتكم كانت معاي حتى لو ما قدرتوا تكونوا حاضرين.
وربنا يجمعنا دايما فى الأفراح.. ويكتب ليكم الخير وين ما كنتو 💜❤️💚
ورغم بُعدى برسل سلاااامي يحوى شوقى وكل احترامى.