ابن مرشد ( عمار دريسه ) .. صعود وتألق نجم فى سماء التحكيم
شبكة الوريفة الإخبارية
🟦 فى الآونه الاخيره كرة القدم بقت اكتر من مجرد لعبه .. وبيعتبر الحكم اهم اعمده العداله فى اللعبه داخل المستطيل الاخضر.
🔺️ يلا ود قريتى مرشد ( عمار دريسه) بعتبرو واحد من أبرز الوجوه الصاعده فى ساحة التحكيم بثقه ما بتهتز مع شخصية فارضه احترامها قبل ما ترفع صافرتها.. وهو ما مجرد حكم بيأدى دورو لا لا بل هو نموذج للعدالة والانضباط.
🔷️ ( عمار دريسه ) اسم لا يمكن نتجاهلو فى مشهد التحكيم .. لانو عندو حضور قوى وتركيز عال طيلة المباراه وبيحسن التمركز وسرعة اتخاذ القرار والتحكم فى مجريات اللعب ..كمان بتميز بوضوح اشارات اليد للتواصل الفعال مع اللاعبين كل دا وغيرو بخليهو مؤاهل لإدارة المباريات الصعبه بحكمه وحنك كبيرين. مما جعلو يكون محل ثقة اللاعبين والجماهير سوا .
🟥 ومع كل ظهور لى ( عمار ) بنتاكد حقيقه واحده انو حيكون لى قدام علامه فارقه وصافره بتعلن قدوم حكم بقوة ما بتتوقف نحو المستقبل.. وبداية عهد جديد من العداله داخل الملاعب .
🟩 ويلا يا صديقى عمار .. نحن كلنا شايفنك ماضٍ فى الطريق دا بثبات وثقه وانت شايل فى قلبك طموح كبير .. وفى عقلك تركيز شديد.. وفى شخصيتك قوة القرار .
🟫 طريقك ابداً ما كان ساهل ، وما كان مفروش بالورود.. من اول صافره اطلقتها كنت عارف انو المهنه دى بتحتاج إلى اكتر من معرفه بالقوانين.. بتحتاج لى شجاعه ، انضباط ، وصبر طويل .. كم مره اتحملت ضغوط الجماهير وانتقادات اللاعبين وبعد دا كلو واصلت السير والمسير بدون ما تتراجع لأنك مؤمن بهدفك الكبير .
⬜️ خطواتك اليوم ما عاديه لكل الناس المتابعه لمسيرتك التحكيميه.. كل مباراه بتديرها كل قرار بتتخذو اكيد حتكون لبنه تضاف فى صرح مستقبلك الزاهر .
انت ما بتدير مباراه فقط .. لااا لأ .. انت بتصنع اسم وتبنى تاريخ .. ومع كل تجربه بتكون أقوى واكتر حكمه واقرب إلى حلم راية العالميه.
🟪 صديقى ( عمار ) تأكد انو العالميه ابداً ما بعيده عنك ..لانو نحن شايفين إيمانك بنفسك ومن إلتزامك.. ومن تطويرك المستمر.. فاجعل من كل خطأ درسا ..ومن كل نجاح دافع .. وما تنسى انو الكبار برضو كانوا يوم فى بداياتهم، لكنهم ابداُ ما وقفوا.
❤️ حقيقه نحن فخورين بيك .. وفخورين بى اصرارك وشغفك.. بى خطواتك البتسير بيها بثقه نحو القمه والعالميه.. وكمان واثقين انو حيجى يوم نشوفك وانت بتدير اكبر المباريات.. وحترفع رايتك بين حكام العالم .
🔴 واصل يا صديقى .. فأنت على الطريق الصحيح ، وبخطى ثابته نحو العالميه.
فإلى الأمام ونحن كلنا معاك .
🟠 بإسم نادى مرشد الرياضي بحلفاج بالقريه ١٠ .. وكل محبى كرة القدم كامل دعمنا ومساندتنا للحكم ( عمار على ) ايماناً منا بكفاءته ونزاهته داخل الملعب ..
كلنا ثقه فى قدرته على تجاوز التحديات ومواصلة مشواره بثبات نحو التميز .. والنجاح فى قادم الاستحقاقات.
كل التوفيق لك يا ابن قريتي حكمنا الدولى القادم بكل ثقه وثبات ( عمار دريسه ) ..وانت تكتب اسمك فى سجلات التاريخ كأحد افضل حكام كرة القدم ..
ونحن معاك خطوة .. بخطوة.
هذه الصور من كورس مشاركته بالخرطوم بعد اختياره من ولاية كسلا .. وهو كورس حكام كرة القدم داخل الصالات والذى نظمه الاتحاد السودانى لكرة القدم بإشراف من الاتحاد الدولى لكرة القدم ( فيفا ) .. وذلك ضمن برامج تطوير الحكام وتأهيل الكوادر الوطنيه وفق أحدث البرامج التدريبيه المعتمده من ( فيفا ) .
الكورس بمشاركة عدد ٤٠ حكما تحت إشراف الخبيران العالميان سيد نورى من الشقيقه ( المغرب ) وميشيل من ( ايطاليا ) اللذان حاضرا اسفيريا عبر تقنية الاتصال عن بُعد .