🇸🇩وطني و كفى _ للشاعر محمد الحسن سالم حميد

🇸🇩

يا الله
ما أحلى الوطن
حلم المسيح
ﻻمن يكون إنساني
زي صدر الرسول
ماهل وهيط
علي قدر شوق الزول حنون
زي نسمة الفجاج نشيط
بي بسمة للمحتاج بسيط
مد الضراعين الخدر
ود الأصابعين السبيط
ما جهجهو المطر الكتر
ﻻب يفقهوا الريح العبيط
يا الله ما تديني ياه …
أديهو عمري فدىً
عشان تبقى الحياة المخضرة
بي ناس أوفياء
الأرض ورث الصالحين الأنقياء
ويا دنيا مين زي المسالمين أتقياء
يا الله، و ان زالوا الرسل
ما زالوا ، منك ، أولياء
أقبلني واحد منهم وألهمني صبر الأنبياء
علي عالمي المجنون يكون
مسكون محبة و حن ضياء
من ناس شموش
تطرد ديوش الضلمة والضر والرياء
يا الله أنا الكادح إليك طول الزمن
ماب أوصلك من دون وطن تديني ياه
ودان ماهو .. الله .. الوطن
يبقى الدرب واحد مي .. يا ؟
يا … لو يحق
من كتر مافي من عشق ياها الدلق
دار انطلق زي البرق
عريان وحفيان كالضياء
مندلي من شمش الشرق
أو كالمياه و النيل عرق
حامي العرق
أو كهرباء زوﻻ غرق فيك يا عشق
درويش فراش تحت الدعاش
ﻻ وش عرق ﻻ اختشاء
عميان يقبل في الخلق من جم
يسونق فيها ضم بي انتشاء
يا لو يحق أنا دار أبردب بالدروب
متل الهبوب ، أقمار أتلب بالبيوت
أهتف بما في من عشق أهواك موت
أهواك من قيف الكلام
أهواك ﻻ كير السكوت
أهواك يا …. يا التستحق
يا الفيي .. بس .. ماب تتلحق
دار انطلق
زي ما خلق
زي ما انتو
يا أهل القبور
من جتة أو من حتة بور
ريح
من عشق
ارمي البذور
وأهمي المطور
شقيت جداولي الأوعية
وأنده على الموت بالثبور
كفي ملانات أدعية
كف
يفرش المتأنسنين
و التاني
يطوي الأدعياء
بسم الحياة الياها الحياة
أرقيكي عن شفق الغروب
وأفزع ملائكة الدروب والضائعين
الرائعين والسامعين من أنبياء
ننجيكي من نار الحروب
والطامعين والأوبية
وزي الهواء زي موية أو حزمة ضياء
بيكي انطلق عريان و حفيان يا وطن
منك عرفت أخجل متين
وأفرز متين قل الحياء
ومن كتر ما بي من بلد
في جيدي حب من أبد
ياها الجسد دار انحرق بالشوق
و أبق الأمنيات يا أصفياء أو دار أرق
وأدخل عرق يمرق سنابل و أغنيات
راويها دمع الأبرياء
دار اندفق فطن الترى
ما ليا بالفوق التري
ﻻمن يغير مني السحاب
يروي التراب بي شوقو ري
ويمرق خدار ست الجزيري
الدابو لسة قشيش و ني
و أنا ﻻ تماسيح تهوج
ﻻ من عماسيبا تلوج
ﻻ ريح و موج يحمني جي
قوز الدميري تكنو مطرة
قدر كويرة تحت شديرة وسط ودي
أو أكنو قطرة من العطر
أو قول قطيرة في نص إيدي
أو أكنو ما شاء أن يكون
أنا بالصدق هنا يا مكان من بعض شي
فوق كل شي
إما الوطن .. إما الوطن
أما الزمن نطويهو طي بي شوق
أماني شوانا شي لي يمة
إﻻ شوي ، شوي
زمني اللي لي الما علي
وطني البريدك منو لي
عطني البيمرق من حشايا مع الله لي
شجني .. البهدهدو فوق إيدي
وهني البوسدو من حنان صدري
و بغطي بضي عيني
حلمي الصبي همي الأبوي
أمي و أخي
علمي البساهرك
و البذاكرك
حي × حي
سكني .. البسافرك
بين “مشاعر”
و بين “لؤي !”
يا الماب أصدلك بي قفاي
يا الماب أفوتك بي وشي!
ما جع ، مضغتك
وانت ماك وثني الصنيعة راحتي
ما أنا ماني شاك في سر نشاك
من وين يكون دون والله حي
وطني الكتير
بالشي الشوي
هاك المنام من مقلتي
هاك المتاح من تضحيات ، هاك كل شي
ومن بعض حلم أهلي المباح
هات الصباح
يا كل شي
يا مشتهايا وكت أدور
يا منتهايا محل أدور
دمي البحرسو
من الطيور!
لحمي البحاحيلو الحدي
نغمي البلاهو وﻻ طيور صدحت وﻻنقرش نقي
يا هو .. البفيض
إنساني .. من نهر الأصول
ماهو العريض الحاني زي حجر البتول
وطني . ،. النقيض لي باني أنظمة الأفول
وطني الخجول بالعافي في الزمن المريض
كل الظلال سوداء
ونوايا القلب بيض
كل العروق خضراء
و حبال الود وريد
ماهي الدموم حمراء وسماحة الزول شهيد
زهوي
الكفاني القندفة ..
خطوي المعاق ، إن حر ،
و ﻻ قادل علي قيد انكفى؟!
رطني البغني علن وارقصو بلا خفا
وطني العديل
الفقري و العامر وفاء
ما هو اليصلني و أصل حفا
ما شيد الطاغوت جدارات من جفاء
وطني الوطن
وطني …
و كفي .
يا مبدي
بي فجر المسيح
مختوم بمسرى المصطفى .
يا من تراني و ﻻ أراك ..
و أقرب لي من حبل الوريد
وطني أو الحجر الأكيد
يا راحلين بالغنوة
في ساعة هويد
ما شفتو لي ..؟.. في الشفتو في
زولي الملامو محنة
كتر الريدة غي
قلدي سلامو الحنة شالت في يدي
يا المي ان بقيت قصرت فيك تصيدني أفي
ووكتي البقش الدمعة من صفحة وشيك
تزيدني سي
يا الله وين في الدنيا زي
وطني البموت وبخلي حي