ذكريات شايله منك كتيير
شبكة الوريفة الإخبارية
🔵 الذكريات بتستدعيها حاجات كانت شاهده على ايام جميله او مُره عشناها مثلا زى شوفتك لى صوره قديمه.. او سماع اغنيه ..او مرورك بمكان او شارع .. او زيارتك لى مدينه .. ولا لمان تجي ترقد تنوم والاخيرة دى صعبه بتخليك تفتش للنوم .
🟢 الذكريات دى حاااجه كدا مؤلمه ييييخ .
لانو بى حلوها ومرها ( مرات تجود بجنانها ومرة نارها ) بتآذينا ااااي بتآذينا لأنها كانت سبب سعاده او تعاسه لينا .. وفى الحالتين انت الضايع .. وتبقى فى مرحلة يارب شيلنى ولا خلينى انسي .
🟡 بتآذينا لأنها بتذكرنا بأشخاص رحلوا ، او أماكن اتغيرت .. وأيام كنا فيها اكتر طمأنينة مما نحن فيهو اليوم .
🔴 عشان كدا محتاجين نعيش مع ناس ما ناخد منهم اااي ذكريات .. آآآي والله.
🟠 يعنى ناس كدا يغيبوا ولا يجوا كلو واحد عندك وما تفرق معاك .
⚪️ ناس ما تطاردنا ذكرياتهم فى غيابهم .. وما يكونوا عندهم بصمه فى ارواحنا..
بالجد محتاجين ليها شديد .. لانو ذكرياتهم بتتعبنا شديد بالمره.
🟤 محتاجين ما نتعمق شديد فى علاقاتنا وأخير تكون سطحيه .. عشان تقدر تكمل مرتاح .. اااي والله جد .
⚫️ محتاجين بقدر الإمكان نحاول نبعد من الناس عشان ما نتعود عليهم ولا نعيش فى تفاصيلهم.
🟥 حكاية الذكريات دى مستهلكه وخاصمه من نومنا .. وافكارنا.. وصحتنا كمان .
🟧 باختصار شديد محتاجين نعيش مع الناس زي الأحلام، يعنى نصحى منو ونحن نسينا مضمون الحلم زاتو كان شنو .
🟨 انا بقول تعبنا من ذكريات ناس ما قدرنا نستبقيهم فى حياتنا .. ولا قدرنا نلحق نودعهم ولا نملأ عيونا بى شوفتهم.. حتى الكلمات الكنت داسيها ليهم ما قدرنا نقولها ليهم لأنهم ببساطه بقوا ما موجودين فى حياتنا بس خلوا وراهم ذكريات مُره .
🟩 ما تعيشوا مع الناس وتتعمقوا فيهم لانو ح يجى يوم تلقى نفسك عايش فى عالم براك .. عالم ما فيهو الا انت وذكريات شايله منك كتير .. لا خالاك مع نفسك ولا كمان مع الناس .
وعشان كدا ( حاول انسي ريدك .. وانسى ماضي الذكريااات )
🔶️🔷️🔶️🔷️
ويااااا .. انت
ما بفيد انا لو ألملم من عيونك ذكريااااات.
……
لاااا .. للذكريات
لاااا .. للحرب