سلام مؤجل عبدالله محمد الحلفاوي
🖊️ عبدالله محمد الحلفاوي
*قالوا السلام سنه لا ريده .. لامحنه.
*وانا بقول السلام سنه .. وريده ..ومحنه ..و شوق .. وأمان.. وإلفه .
*ورسولنا الكريم( ص) في حديثو بقول : أوَلَا ادلكم على شئ ان فعلتموه تحاببتم؟ افشوا السلام بينكم .
*عليكم الله في حاجه احلي من السلام ؟ ما ظنيت.
* السلام دا سمح شديد . وربنا خلقنا عشان نعيش فى سلام وأمان واطمئنان ونبني مجتمعاتنا السليمه.
*في سلام كدا من ناس حلوين انت بتعرفهم براك بس مجرد قال ليك ( سلام ) حتي لو في رساله ( واتساب ) بيرد الروح ويخلي يومك كلو حلو .. وكمان ممكن ما تفطر زاتو لو شُفت الملاك وبي ايدك سالمتو.
*اما لو مر بيك من غير كلام .. ولا حتي بس قولة ( سلام ) تقعد تسأل روحك ياربي انا عملت شنو ؟ وتشيل هموم الدنيا كلها وتقعد تغني احرموني ولا تحرموني سنة الإسلام( السلام ).
*ويظل السلام هو الشئ الوحيد الذى لا نملكه ملكيه كامله .. حتى ولو سكنا فى بيوتنا التى نمتلكلها ملكيه كامله ..وهذه الأرض لنا .
*السلام بقي تحت رحمة من يحمل السلاح .. وأصبح حكرا للاقوياء… ولكنه لشئ فى نفسي السلام صار بالتساوى بين القوى والضعيف معاً .
*هناك سلام قابل للتحقيق والآخر من السلام مؤجل .. والمتاح من الممكن من السلام وغير الممكن تفصل بينهما شعيرة قرار شجاع .
*هناك سلام يتم تأجيله قسراً غصبا عننا وقد يتسبب أحدهم او مجموعه فى ذلك ويصير سلامنا مؤجلاً عُنوةً.
*يعني هناك من السلام ماهو متاح .. وماهو غير متاح .. والحريف هو ال بيقدر يتعايش على قدر سلامه .
*جنٌى وجن الزول ال ما بسلم .. ممكن تقول عليهو متكبر ..شايف نفسو .. روحو شريره .. وممكن يكون مجرم .
*اما البسلم عليك دا بكون بي سلامو قدم ليك عربون موده.. ووئام.. وكاش عزومة قهوة بي فشارها.. ويكون فصّل ليك المحنه زفاف .. وحرق ليك الالفة بخور .. ورشه ليك الشوق عطور .. وفرش ليك الأمان لحاف .. وممكن يحنسك عشان تبيت معاهم .
*السلام دا حلو حلا .. انت والزول داك والبينكم احلي من العسل واجمل من ان يقال ف ( سلام ) .
*السلام عندو علاقه بالعين ( سلام لعينيك البعيدتين ) .. زول تجتمع بينكم حاجات كتيره .. وفوضى حواس بتصيبكم اول ما ( تسلم ) .. والمسمى الحقيقي لل اللخبطه دى كلها ريده .. وحب .
*وخلي بالك دلائل الريده لما تبان ما بتدسّه فى ( سلام ) .. وخلي بالك في أيدي وقت اسالمك .
*ويجب علينا أن نحكم على الناس فى زمن الحرب وليس فى زمن (السلام ) .. حيث يتصرف كل شخص على هواه وطبيعته دون ضوابط .
*وياااااا.. انت
لقد كان مجيئك او ( اتصالك ) لى بمثابة مجئ واحلال السلام إلى قلبي .
*عندي صحبي كان جدو زارع بطيخ لو سلمت عليهو وهو فوق زراعتو ما كان برد السلام .. سالوه ليييه ما بترد السلام قال ليهم : السلام بجيب كلام .. والكلام بجيب بطيش هههههههه.
***
وسلام يا وطني يا غالى السلام .
*وانا شايف حمائم السلام بترفرف فوق اسقف بيوتنا.. وفوق مآذن مساجدنا بس اجنحتها تعبت من المدافع والمسيرات بالله عليكم شتتوا ليها السكر ودعوها تنزل فى وئام قبل تحلق بعيدا دون عوده
وطني لك مني الف تحيه