عبدالله محمد عثمان يكتب :إتحملونا .. قبل تحبونا
شبكة الوريفة الإخبارية
🟥 عارفين الحرب اللعينه دى ما مجرد نار اكلت الحجر ودمرت البيوت وغيرت ملامح الشوارع وبس لا لا .. الحرب دى يييخ اكلت البشر كمان وغربلت النفوس وغسلتها جووه وبررره .
ما كده وبس كمان طيرت مننا المجاملات والبلبصه ما قصدى البلبسه انتو ي البلابسه.. وخلت الناس عرايا من كل زيف .
🟩 قبل الحرب دى كنا بنفتش عن ( البيحبونا ) والحب كان مجرد كلمه حلوه وقصائد وقعدات وقطيع نجيله وكلام سمح نص الليل ..
بس هسه مع النزوح واللجوء والحاصل .. والقلق والخوف المالى الجوف والمستقبل الضايع وما عرفنا بكره فيهو شنو .. اكتشفنا انو الحب براهو ما كفايه والحب الحافى دا عمرو قصير مع الضغوط البتزيد كل يوم .
🟧 ودا بأكد لينا انو الحب ما كلمه سمحه وبس .. الحب صبر .. احتواء .. وتحمل اوقات الضغط والضعف قبل القوة .
🟦 وعشان كدا قبل ما نفتش على ناس ( تحبنا ) .. احنا محتاجين نفتش على ناس ( تتحملنا ) .. آآآي والله.
وحوجتنا الحقيقيه بقت ( للبيتحملنا ) قبل يقول لينا ( بحبكم ) .
🌹 يلا يعنى شنو زول بيتحملنا؟؟!!
🟠 دا الزول البيفضل جنبنا فى أسوأ حالاتنا.. يعنى ما الزول البيغنى ويصفق لينا لما نكون سمحين وبالنا رايق لا لا.. دا الزول البقعد معانا فى شناتنا ولما نكون متضايقين.. وما يمشي مننا اول ما يشوفنا تعبانين او فى حالة بتاعت ضعف.
🔴 دا الزول البيتحملنا لما تكون قافله معانا وما على طبيعتنا ونكون صامتين لا بنسأل ولا بنتكلم كتير ..
يلا الزول دا بيتفهم الحاصل وما بيشيلها فى خاطرو ويقول اتغيرنا عليهو وما بيلومنا العكس بفتش لينا الاعذار وممشيها بي الاغنيه البتقول( اغلطوا انتو يا أحباب.. نجيكم نحن بالاعذار ) لانو فاهم الجوانا اكبر واتقل من الكلام .. وانو القلب بيمر مرات بي حاجات حتى ما بتتقال .
🟡 دا الزول البيتحمل ( عصبيتنا ) ..
مع الحرب دى بقينا كلنا عصبيين.. بقينا ننوم على قلق ونصحى على الخوف واخبارنا كلها توجع القلب .. يلا الحاجات دي مرات بتطلع من جوانا فى شكل نهره او زعله من تفاهه.. او نقه ما ليها اول ولا اخر.
يلا الزول البيتحملك فى اللحظات دى وما برد ليك الاساءه.. لا كمان بياخدك فى حضنو ويقول ليك ( عارفك تعبان معليش ) يبقى دا زولنا وحبة بندولنا.
🟢 دا الزول البيتحمل هضربتنا وخوفنا..
لما نقعد نلوك فى نفس الكلام والمخاوف مية مره ( البلد دى ماشه وين ؟؟!! متين نرجع بيوتنا ؟؟!! .) .. الهضربه دي كلها وزولك ما يزهج منك ويقعد يسمع فيك فى كل مرة وكأنها المرة الأولى.
🔵 الزول البيتحملك دا الزول الشاف اسوأ نسخه منك ( الخوافه.. النقناقه.. المتبهدله.. المعولقه.. الزعلانه من الدنيا كلها ) بعد دا كووولو بيمسك فى يدك قوي ويقول ليك ( انا هنا ومعاك .. وما ماشي ااي حته من جنبك) .
🌼🌹🌼🌹
🔶️ يا اخوانا المشكله انو الحب اسهل ما يكون وقت الرخاء لما نكون رايقين وراضين كلنا بنتحبه.. بس مع الحرب دى والظروف والمسئوليه الحاصله دى بقينا كلنا عبارة عن مسوخ مشوهه نفسيا ومقلقين وخايفين وسريعى الغضب وطوالى بتكون قافله معانا لدرجة ما بنتبلع.
يلا فى الظروف دى العامل فيها بحبك ممكن عادى وبالساهل يطفش منك من اول مشكله عصبيه ويقول ليك ما بقدر اتحمل النكد دا .
🔷️ والله يا جماعه التحمل دا ما ضعف منكم بل هو من اسمى درجات الانسانيه وجبر الخواطر.. والبيتحملك الايام دى وفى ظل الظروف المارين بيها دى عليك الله ما تفرطوا فيهو وواصلوه لانو دا زول من دهب ودا السند الصح والحقيقي البتتكى عليهو لما ركبتيك تخذلك .
🌼 فأبقوا دايما عافيه .. وماسكين فى الزول البيتحملكم.. آآآي والله.
لانو الاحتواء زمنا دا بقى أغلى وأهم من الحب زاتو.