الفقد واحد .. والعطر باقٍ _ بقلم عبدالله محمد الحلفاوي
بقلم / عبدالله محمد الحلفاوي
* أصدق واوفى حب ممكن تعيشو فى حياتك .. دايما بدايتو بتكون مبنيه على مبدأ ما عايز احبك .. خايف بكره ( افقدك ) .
وخوفنا على الفقدان هو أساس ااي حاجه حبيناها شديد .
* بمجرد ما تسمع كلمة ( فقد ) أدرج معاها ( الفراق .. الحزن .. الألم.. الدموع .. الآهات . )
وكلها تهز ارواحنا.. وتُخِل بعقولنا وتوازننا.
* جربت ألم الفقد ؟؟ .. هو أقسى وافظع شعور يمكنه ان يصيب قلوبنا والانسانيه جمعاء .. وأصعب ما فيه انك تكون عاجز فيه تماماًً .
عشان كدا اكتر حاجه بتخوفني.. ( الفقد ) .
* يلا حجم الفقد وتأثيره علينا يكون على حسب أهمية الشئ المفقود ومكانتو واحساسنا بيهو .. لانو بتديهو الاولويه فى كل شئ .
والاولويه دي بتتولد بي التعامل .. والاهتمام والريده والحب .
* والاولويه دي زاتا بتترتب جوانا وفى احساسنا ومشاعرنا بالدرجات على حسب إلتصاقنا وتعاملنا مع المفقود .
* فى حاجات بنفقدها لكنها مع الزمن ممكن ترجع لينا تانى او نقدر نرجعها بي اجتهادنا.. بس فى حاجات كدا بعد تفقدها نهائي ما بترجع حتى لو عملنا المستحيل لاسترجاعها.. حتى لو ندمت وسفيت التراب .
* ممكن تفقد ( عملك .. أحلامك.. شهرتك ) لكن صعب جدا عندما تفقد حب الناس فيك .
* ازعلوا.. وجوطوا في بعض ..واتشاكلوا.. بس فى يوم ما تحسس زول بحبك انو ( فقدو وفراقو ) عادى ومقبول وممكن .. لانو بعدها ما حيرجع ليك بتاتاً وللابد .
[ وحات الريده ما قايلين يجينا زمان يفرقنا ]
* لمان اتكلم عن ( الفقد ) ما تعتقدوا انى بقصد بيهو حبيب/ة ما تنسوا انو الفقد برضو بيشمل المكان / الاهل / الأصدقاء/ الاحلام / وكثيرا هذه الايام ( الأرواح ) .. وممكن كمان يكون ( وطن ) ااااي وطن عديييل .
* بسبب هذه الحرب اللعينه أصبحنا فى بلادي ( الفقد ) ولن تواسينا كلمات العالم اجمع .. اصلا بقينا ما قاعدين نسمع غير ( الفقد )
* الفقد واحد .. بس المرحوم ما واحد .. والمتوفى وطن .
* انتو متخيلين كل واحد فينا فقد كم من عزيز .. يييخ بقت فينا كمية وجع كدا ما ممكن غيرنا كسودانيين يتحملوه او يستوعبوه.
* ما اظن يكون فى بيت سوداني او أسرة او مجتمع سوداني ما فقد في الفترة دى شئ عزيز عليهم
فالفقد واحد .. ولكن العطر باق
* في المشهد السياسي .. الكثيرون ( فقدوا ) تعاطف الناس وثقتهم.. فلم يعد احد يصدق ألاعيبهم ووعودهم.. فقد اخرج الشعب السوداني لهم شهادة ( فقدان ) او شهادة وفاة عدييل لكنهم مواهيم.
* ( وفقد ) جنيهنا الكان عزيز علينا مكانتو وثباتو وبقى كل يوم نازل ومنافس الأغانى فى الهبوط المريع .
* ( وفقدت ) مجموعه كبيرة من المواطنين الحياء والاحساس بما يحدث من قتل ودمار فى البلاد وهم يتراقصون بصوره سافره في صالات بعض الدول .
* ( فقد ) الفن السودانى بريقه وألقه بسبب سيطرة الاغاني الهابطه.. وبات الشباب يتمايل مع أغنيات تعكر المزاج وتسمم الوجدان ..
[ اضربني بي مسدسك.. وحبيبي طقشتو الركشه ] .
* ( وفقدت ) الساحه الرياضيه حرارة المنافسات بين هلال مريخ.. وفقدنا نحن كجمهور متعة الفوز وآلام الهزيمه.. والمناكفات والمغالطات بعد المباريات.
* ( وفقد ) اطفالنا الامان والحنان وآبائهم.. ومنازلهم.. ومدارسهم .. ولعبهم في الطين.. وشليل وين راح .. ودافورى الحله.
* ( فقدنا ) بيوتنا .. وشوارعنا.. وكبارينا.. ومصانعنا.. ومزارعنا.. وجامعاتنا.. وكل شئ بيدفع بنهضة بلدنا.
* ( فقدنا ) كل احلامنا وطموحاتنا الكانت مرسومه جوانا من زمن نحن أطفال صغار .
* ( فقدنا ) صوت المآذن بالصلوات.. ليلة ذكر .. حلقة مديح .. دارة غنا .. هيصه ورقيص .. القرمصيص.
* ( فقدنا ) لمة الناس الحنان يوم الضبيحه.. وشاي اللبن بى بسكويت البيت المعمول بحب .
* ( وفقدنا ) يييخ وطن عزيز يفيض جنات .. وفقدنا غزة ارض الديانات.
* ( فقدنا ) امل الرجوع لى بيوتنا واصدقائنا واحبابنا.. بعد فشل كااافة المفاوضات.
* ( فقدنا ) مشوار الهوى الودرني.. يوم فترنى بي امشي وتعال
وفقدت ال في العصر مرورو.
* ( الفاقدين ) قلوبهم كالنوافذ.. خلف كل نافذه قصه.. وخلف القصه قلوب مختلفه تنبض بالألم بالوجع بالمعاناه والفقدان وما لا يشتهي ان يحكي .
شعب كان جيت للنصيحه اصلووو ما المفروض يعاني .
* وياااااا من تتقاتلون فوق رؤوسنا.. فوق جماجمنا.. يكفينا ما فقدنا من ارواح وأمكنه.. ويكفى هذه البلاد ما ذاقت من الوجع والدمار.
فأين كرامة الشعب فى هذا ( الفقد ) العظيم.
* وياا اخوي الاستاذ :
ما اشد وجع القلوب على ( الفقد والفراق ) فهيبة الفقد احاطت بالقلوب.. والموت حق إلا أنه مر ويترك ألما خرافيا..
وعارفين لسسه جرح الفقد أخضر
بس غايتو.. الله يصبرك.
وياااااا.. انت
فى ( فقدك الكبير ) .. الكبير والصغير بيسألوا عنك .
ولما ترجع بالسلامه.
الثلاثاء ١٠/ ٩ / ٢٠٢٤م
مزرعة البيشي
طريق نجران .. قرية الفاو
الساعة ٩:١٥ مساءاً .