شختك بختك وحمد ديره العطا علي العطا. ٠٠٠ البركل

العطا علي العطا. ٠٠٠ البركل
السبت ٣١ أغسطس ٢٠٢٤م

قبل السماء
مايشيل المطره
وقبل السيل
مايجي جاري من الصحراء
وقبل النيل مايبقي دميره
ومويتو الصافي تصبح عكره

قبل الحرب
الحاره تقوم
وتسل الروح
وتخلي الناس
في شتات ونزوح
وتمرق تمشي تخلي دياره

حقو نعاين
وزين نتمعن
في واقعنا
عسي ولعل
نلقالنا دباره

وتاني نقارن
بين حالتنا يوم الليلي
وقبل علينا تدور الدايره
ايام نحن عشنا حياتنا
صلحه وستره
بالفي ومافي
وضهر البيت فوق ضهر التمره

وكيف ياكيف
رغم سهولنا الخصبه البكره
ومويه انهاره
كانت عندناخيرات وافره
ومع ذلك كنا نعاني
الشح والندره

بس شان نعرف
سر السر
الخلانا تملي حياري
ودائما نعرض بره الداره

كلنا كنا سياسيين
ليل ونهار نتابع النشره
وكلنا شغالين شختك بختك
وكلنا نلعب حمد ديره

يومي علي الله
عندنا ندوه
وحجي ودوه
عن البارح واول البارح
وما بنجيب سيره يوم بكره
ولا خاتين في بالنا بتاتا
انو المشي بتعدلو العتره

والمفروض
نناقش امورنا
بكل تراضي
عشان الناس تاخد حذره

و من الماضي
ناخد نحن العظه والعبره

من ايام كنا
نشوف ونعاين
وحلقنا كانت
ساده العبره
رغم الوفره
الفي انتاجنا
ورغم الكتره
الفي خيراتنا
نحن جميعا
كنا في وكره

ويا للحقره
ونحن نعاين
وساكتين ساكت
ومصر مصره
من خيراتنا تشيل الدايره
وباقي الباقي لو ما اتهرب
بي نيروبي أو بي اسمره
يمرق مارق عبر الكفره

سبحان الله
السوداني في بلاد الله
سمعتو طيبه
وزول زول خبره
لو كان عامل
زول يوميه
وشغل الاجره
لوكان عالم
وزول متعلم
عندو شهاده دكتوراه
مافي فرق بيناتن ابدا
ديل علي ديلاك للسودان
هم كانو السفراء

وفي السودان
السوداني بقي زول تاني
لو ماحاسد تلقي اناني
يازول حجه نقار ومداقره
او زول سمسره

وكم لله ناس فاتحين
مكاتب هجره
وسفر وسياحه
وتأشيرات للحج والعمره
واصل الشغله بيع شراء
في العمله الحره

فوق للفوقنا
كل صباح تظهر لنا قونه
لا بت دنيا ولا بت اخره
بت مجنونه
تغني وشاعره
وبيها احواله
هي اكيد ماشاعره

دحين ياخواني
بس علي فكره
شان مانمرق
من ها الحفره

كلنا نعرف
انو السيل ماجانا زياره
ولا جات ساكت لينا المطره
وانو الحرب الدودت فوقنا
فيها الصاح وفيها أرباح
زي مافيها خراب وخساره

وتبقي العبره
اننا نحن نبقي عرفنا
انو المشي بتعدلو العتره
وبدل البارح واول البارح
هما يبقي في يوم بكره

وفي المستقبل
وتبقي حياتنا ارحم واجمل
ونحمد الله ونشكر الله
كل ماتنزل صابه المطره
وكل ماينزل جاري السيل
يروي ويسقي الارض البكره
داك الحين نفيق ونريق
وننسي الضيق
وننسي الظلم الغبن الحقره
وكل قواسي وكل مآسي
الحرب المره
العشناها وعايشناها
تصبح ذكري