💚شهر القلب ❤ عبدالله الحلفاوي
💚 شهر القلب ❤
عبدالله الحلفاوي
شبكة الوريفة الإخبارية
💜 قال تعالى فى محكم تنزيله ( ياأيها الذين آمنوا كتب عليكم الصيام كما كتب على الذين من قبلكم لعلكم تتقون )
ويقول حبيبنا المصطفى ( ص ) : ( المسلم اخو المسلم لا يخونه .. ولا يكذبه….. التقوى ها هنا ويشير إلى صدره ثلاث مرات .)
💙 تشير الايه الكريمه إلى أن الغاية من هذا الشهر الفضيل هو التقوى .. ويشير الحديث إلى أن التقوى مكانها القلب .
🧡 والتقوى هى الخوف من الله واجتناب عذابه بفعل الخيرات وترك المنكرات ..
وكما هو معلوم لا ينشأ الخوف الا عن المعرفه بجلال الله وعظمته.. والخوف والمعرفه محلهما القلب .
🤍 يلا جانا رمضان يجمعنا من تانى بى بهجه فى النفوس .. وسكينه فى القلب .. وهدوء فى العقل .
فيارب اهّله علينا بالخير .. لا فاقدين لا مفقودين وأنعم علينا بالأمن والإيمان والأمان فى جميع ربوع البلاد .
💛 ١١ شهر والفتن بتُعرض على القلب .. يجى الشهر دا بيغسل ويصنفر القلب عشان يطلع منو نضيييف ( قلب سليم ).
💚 فى رمضان أشعر انو الإنسان يصبح أقرب إلى حقيقتو وأكثر صدقا مع نفسو .. بدون أقنعه..فقط قلب مكشوف أمام الله.
🤎 دِفق ذكريات من ايام بطعم الحلو مر :
رمضان اول يوم فى البرش نتونس وناس الجرسه يقولوا خلاااص مرقنا باقيلنا ٢٩ يوم .. ونتغالط فى الهلال دا يوم ولا يومين؟؟!!
وقبل ناكل سمح يقولوا قوموا للصلاة .
❤️🩹 فى رمضان اختك كل يومين محرقه بصلة الملاح تشد الحله وتجي تقعد تتقهى وتسرح مع المسلسلات.
💞 وحبوبه الما صايمه ديك تجي بعد المغرب شايله جبنتها عشان ترقد فى السرير القصاد التلفزيون وتتفرج فى اغانى واغانى لمان تلقاك راقد تنهرك وتقول ( هووى قوم خلينى إتمدا بعد اليوم الحار دا 🤣🤣 التحية لى كل حبوباتنا. )
🖤 فى امسيات رمضان قعدات الجبنه الجنزبيلها معتق البترويك لو فى زول ساااي شربها قدامك..والأصحاب والونسات والضحكات والتشغيلات دى أجواء ما بتتوصف..واحساس غييير.
💜 وما ننسي العصريات ومرور الناس فى الشوارع المليانه بى ريحة الآبري.. وميدان الكورة الضاجى بى دورات رمضان لاطفالنا الحلوين دا طعمو براهو واحلى من طعم الحلو مر .
💙 الواحد جا الغربه دى وبقى بعيد من الدار والأهل.. بفتش عن حلمو .. وشايل طموحاتو وبعض من أنفاس اهلو واصحابو واحبابو العالقه فى روحو.
🧡 لكن لما جانا رمضان فى الغربه الواحد اكتشف انو الغربه ما هى بٌعد مسافات لكن بالتاكيد هى ما نفتقده من تفاصيل صغيره زى لمة الناس فى البرش قبل الاذان .. وريحة الطعام والمشروبات البلديه.. ودعاء الوالدين والأحباب.. والطمأنينة الطالعه من البيوت.
🤍 رمضان بعيد من الأهل ما مجرد صيام عن الأكل فقط بل اكثر من ذلك بكثير فهو صيام عن الوجوه التى نحب .. والأصوات التى ألفناها.. وصيام عن حضن وطن آمن .
💛 الشهر دا فى ناس استقبلوهو بحزن وألم بالغين تحت خيام النزوح.. او فى بلاد اللجوء.
💚 يلا الناس ديل حالتم أصعب مننا ولازم نحس بيهم وهم بيفطروا على الشوق للبلد قبل التمر .. وهم بيبلعوا الدموع مع أول جرعة ماء .. واجب نحس بيهم وعيونهم تترقب الغروب وهى بتحدق عن وطن بعيد منهم لا يمكن الوصول اليه حاليا .
🤎 برضو فى ناس معانا استقبلت رمضان مفجوعين بمعنى الكلمه بفقدهم لاحبه واصدقاء كانوا حضور يزينون الحياة ويجملون ليالى رمضان .. فلهم الرحمة والمغفرة.
❤️🩹 فى الثلاثه أعوام الاخيرة لم نعش أجواء وملامح رمضان التى نعرفها وألِفناها .. لان عناوينها تغيرت للدم .. والخوف.. والدمار .
💞 فياليت كل من يحمل السلاح فى هذا الوطن أن يصوم أيضآ عن سفك دماء الأبرياء( فاللهم فرجا من عندك لضائقة بلادنا ).
🖤 فنحن نريد شهر رمضان هادئ يعم فيه السلام .. شهر صلات ولمة عائلات تشاهد المسلسلات والأفلام على التلفاز فقط لا على الشوارع والساحات.
💛 رمضان يجب أن يكون شهر رحمه لا منصة تحريض وارهاب تضج بشعارات الكراهية.
❤ ورمضان كريم والبنحبو كل كريم يارب ..
وان طال صيام الامنيات سنروى ظمأنا يوما ما .
*** *** ***
🟣 زمن كنا صغار عندى ود خالتى قال لي بكره نصوم قولت ليهو قداام يا زول .. اها أصبحنا هو صيام وانا ما خليت حاجه من الصباح ما اكلتها🤣🤣 بديت بى باقى السحور وعملت فيها صايم من اشوفو أصُر وشي هههههه.
*** *** ***
ويااااا.. انتٍ
صاج البيتزا بيعملوا فيهو أييي شي غير العصيده 🤣🤣.
ولا دا تفكير خارج الحله 🤪.