كرم الله حسن ارتلاوى للحروف يلاوى
بكره باذن الله نرجع نمشى للعاصمه الابيه
نعبر المصفى ونعدى ندى للجيلى التحيه
نسالم الكباشى ونقالد بى نفس طيبه ورضيه
نواصل المشوار وناخد راحه فى السقاى شويه
نقول سلام ديك اب حليمه (وندى للكدرو التحيه)
وهناك حلفاية الملوك فى علاها كما الثريا
صامده ما هابت محن نلقاها صابره على الاذيه
يا سلام شمبات وناسا والجلسه للجبنه العشية
ويجينا صوت النور محنه يغنى للكدرو البنيه
السلام والشوق كتير لى عموم بحرى وديومه
لى حواريها وبيوته نقضى فيها اليوم نحومه
نمشى ونزور حلة حمد والدناقله نقضى يومه
ونلقى بحرى ياها ذاااته بى بدوره وبى نجومه
المؤسسه ناسا جايطه المواصلات جايبه وتودى
نقصد أم درمان ونمشى نقطع الكبرى ونعدى
لمة الشهداء وضجيجه كل الخلق لى سوحه تردى
داك يبيع ليمونو بااارد وكوزو من بره بيندى
صف من الحافلات مرتب بى نظام تملأ وتفضى
وكل محل فى ام در بتوصل لا مسابقه لا تحدى
المورده وهاشماب وعرضه نمشى بى مهله ونطوفه
نعبر البوسته ونفوت والمسالمه كمان نشوفه
نلقى فيها غزاله راتعه سمحه متكاملات وصوفه
الركابيه وجوارها
والعمده بى نوره ونضاره
ياما ناس طيبين ولوفه
هناك بيت المال محنه وناسا تفرح بى ضيوفه
والطبيعه جماله باين تلقاهو فى ابوروف فى جروفه
ونمشى للثورات نحوم مابنحس فى لحظه خوفه
ود البخيت قدام بنرمى نخلى للحتانه خانه
ناس بتطلع وناس بتنزل مطمئنه وفى امانه
نرفع ايدينا ونسلم لاى زول واقف رِجانا
عشان يجيك داير يطايب هاشى فرحان لى لقانا
والقدله فى امبدات عصير ياها غايتنا ومنانا
كل شئ فيها عادى عامره أسواقها ومزانه
والفتيحاب يا سلام ياها دارنا ومشتهانا
يلا قوماك يا زميل عجل اسرع قوم معانا
نلقى ناس طيبين خلاص فيها نرتاح من شقانا
ما بتحس انك غريب ولا بتجيك من زول مهانه
كأنه ماكانت حرب ولا عوت فوق راسها دانه
ابو ياسر حبابك فى الصالحه قاصدنك زياره
عشان تقوم قدمنا تمشى نمر عليها حاره حاره
ياما عانت وكافحت ضاقت ايام فيها حاره
لا لا ما هانت ولا لانت صامده بى قوه وجساره
نقيف سلام تعظيم عشانه نفديها بالروح ما خساره
قبلنا راجعين من هناك للعرضه نمشى الاربعين
نلقاها عامره متاجره بدل الدواسات والكمين
يا ربى تحفظها والجوار ندعوك يا رب العالمين
انتى ياخرطوم فريده مافى فى الكون ليك مثيل
ترجعى اجمل من زمان بالخضره والوجه الجميل
وتوتى شامه على خدودك يمر عليها النيل اصيل
والبنايات تانى تشمخ ويرجع الزمن الجميل
والمآذن يعلو صوته والتلاوات والتراتيل
والحدائق تانى تزهو وتفتح ازهار الخميل
امشى شارع النيل بتلقى كل الوزارات داومت
وكل دواوين الحكومه على مهامه اتسابقت
والعمل عجلاته دارت والناس جميعها اتكاتفت
تحميك يا وطن الشموخ ولى حماك اتعاهدت
نمشى شايلنا الفرح نمر على برى الفتيه
وتنهض المنشيه تانى بى عزيمتنا القويه
والعمارات والرياض نابضه فى وجدانا حيه
بكره ليها الناس تعود وترجع العيشه الهنيه
تصبح السجانه عامره وسوقه يلبس توب جديد
والديوم تمرق تهلل باقيه ليها الدنيا عيد
فرحانه بى عودت دياره ولمت الناس من جديد
فرحة القوز والرميله بى رجعت النازح بعيد
وتدق طبول الانتصار واحتفال من نوع فريد
ابدأ يا زول من جديد بالبسمله والنازعات
وحِد المعبود وكبر ديل اسود فى مدرعات
انت فى الشجره النضال ارض الصمود ارض الثبات
اتلموا جيش ومواطنين زحمة وفود للفرحه جات
ومشينا قدام للكلاكله ناس كرام حلوين صفات
بهجه وحياتهم فى امان فى روقه عايشين فى ثبات
وبكره يا خرطوم تعودى راكزه بى قوه ثبات
وتقومى من اول جديد اجمل كتير من اللفات
بكره نرجع ليك نعود ونعمر الاصبح رفات
وتبقى عنوان للتوالف وبرضو للعالم عظات